dimanche 23 mars 2025

((( أمي ))) /// 🖋 الشاعر محمد علي فرغلي احمد

((( أمي )))

أمي يا بنت أبوزيد
الكرم والأخلاق آيه 
مفيش زيك اتنين
قمر والأصل كفايه
قمر منور دنيتي
وبفراقك ضلمت سمايا
ميت ألف رحمه ونور
عليكي يا أمايا
عايشه متوفيه
والله روحك معايا
رايح جاي ابوس إيدك
يا قمر دنيايا
وأقولك دعواتك
ورضاكي كل منايا
تقولي قلبي وربي
عليك راضيين يا ضنايا
يا غالي وساكن جوا قلبي
اللي جوايا
ربنا يحبب فيك خلقه
قادر مولايا
ربنا يسترك دنيا وآخره
وتاخد عزايا
ياريتني بعدكم ما عشت
لكن مش برضايا
واديني عايش
وأخدت عزاكي يا أمايا
ومكان مااروح الاقي المحبه
قدامي وورايا
وبركتك عايش مستور
وف الآخره ياهنايا
عايشه متوفيه
والله روحك معايا
ميت ألف رحمه ونور
عليكي يا أمايا
****************
الشاعر محمد علي فرغلى احمد
نزلة باقور مركز أبوتيج محافظة أسيوط جمهورية مصر العربية