فى السوق
بقلم شريف شحاته مصر
سألت تاجر جوارى وعبيد نفسى أشترى جارية
بين سعر غالى وغيره زهيد فى السعر مش غالية
أسعد معاها بقلب سعيد وأعيش حياة تانية
لو كان سؤالى وغرضى بعيد أرحل أنا فى ثانية
ضحك التاجر وهز راسه وقال باين عليك أصلك
يا ابنى الأصل مش بالمال فى السوق يبان أصلك
والبخت لو فيك مال فى السوق يتوه خلك
ولو شمتوا فيك عزال فى نهايته أنا أقولك
فى السوق جوارى كتير ما تلاقى فيه أصيلة
لابسين دهب وحرير بلا أصل ولا عيلة
ولو ناقص معاك الخير ما تشيل معاك شيلة
ولا تستر أمام الغير ولا تسند معاك حيرة
روح يا ابنى إشترى الحرة لو دفعت فيها مالك
راح تصبر عليك فى المرة وتساعدك على حالك
لا تطلب ثراء ولا شهرة وما تشغل فى يوم بالك
حسن الخلق فى المهرة هى أصلك ورسمالك
وعجبى
