ياوجع قلبي علي الولد !!
اللي في لحظه راح السند
واللي مش لاقي المدد
والعالم حواليه كمالة عدد
والحزن خيم ع البلد
والفرح غادر وانطرد
.. عيني عليك يادي الولد !!
الفرح عنده كمان ممنوع
طريقه مفروش شوك ودموع
والالم بيصرخ ومش مسموع
والأمل خيط لكن مقطوع
والهدف سافر ومالوش رجوع
والعطف عند الناس منزوع
... وجعي عليك يادي الولد !!
حياته ضرب وحرب ودم
والاب مات وضاعت الام
ومافيش اخ ولا خال او عم
وجراحه مش قادره تتلم
وايامه كلها غم في هم
يعني اعمي وابكم واصم
... روحي عليك يادي الولد !!
من حقك تحس بالأمان
صاحب اسم وسن وعنوان
وتلعب مع ابن الجيران
وتعيش حياتك زي زمان
من غير حروب ولا احزان
يعني من الاخر تكون انسان .
... اسفي عليك يادي الولد !!
..
حقك علينا يابن الناس
غضبك فوق العين والراس
عايش مع غول مالوش اساس
فاقد النظر والسمع والحواس
مافيش ضمير ولا احساس
والظلم عنده مالوش مقاس
...واكيد نهايته علي ايد الولد !!
....
مع تحياتي
محمد عبدالمريد
شاعر العروبه
