( دكان ساعاتي )
بقلم ( أيمن نصر ) .
******************
والتقيتك في الشجر و الطير .
التقيتك عكس خط السير .
الورود من خدك تتعطر .
و البلابل طايرة تتمخطر .
أندهك ....الربيع يتحضّر.
الشجر من فرحتة بيتصّنت .
و النسايم المسعدة هلت .
الشجر ليه قَلب على لِبلاب .
الشجر بيحاوطنا زي الأحباب .
والشمس بعتت صهدها مشوار .
احنا في أغسطس ولا آزار ؟!
والتقيتك في الزمان السعيد .
انا اللي جنبك هنا ولا مولود جديد .
القمر زارنا ولا لسه عالي بعيد .
التقيتك فوق و لا هنا .
المكان ف الارض ولا ع السما .
والزمان الآن ولا من قبلين .
يا ساكنة جوه نني العين .
الندى بيسيل من الخدين .
والورد دبلان على الجنبين .
انا التقيتك كتير قبل كدة .
كل حتة في جسمي متأكدة .
يا أميرة و قاعدة متسيدة .
و اللقا دة حقيقة ولا خيال ؟!
قلبي واقع ليه لمطرح الخلخال ؟!
قلبي واقف ولا بيجري؟!
قلبي مش كان هنا جنبي ؟!
نَفَسِي واقف ولا عمّال يِجري ؟!
وضحيلي ليه بَنهَج وانا واقف ؟!
حاسس بفرحة ولا انا خايف ؟!
وضحيلي التراب ليه أتقلب بستان ؟!
الهوا مين عَطره بعطر ريحان ؟!
أنا إلتقيتك النهاردة
ولا في الزمان اللي فات ؟!
انا القتيل المتيم
ولا الشهيد اللي مات ؟!
يا قريبة من السما والارض !!
يا حبيبة زي الصلاة والفرض .
خلي بيني وبينك المرسال .
والكلام أحوشه لساعة المقال .
إضحكي واسعفي الملهوف .
القمر حواليك ليه بيطوف ؟!
كل كلمة راح أقولها بحنية
إنت ملاك أصلاً ولا جنية ؟!
وضحيلي الجاية والرايحة .
واكتبيلي الهنا في ميت صفحة .
يا جميلة حتى بالطرحة .
بَدلِيلي مرارة الأيام .
يا عزيزة زي حضن الأم .
كل شيء من غيرك حالة يُغم.
عطشان وانت السبيل و اليَم.
إوعديني إن الفراق مش لينا.
و اكتبي ع الشجر أسامينا .
إوعديني إن الوفا إنكتب لينا .
إوعديني اننا نِشيخ مع بعض.
فكريني ان حبنا أصلاً فرض.
هو زادنا ولبسنا والأرض .
هو أولى في كل ساعة.
والحقي هاتيلي السَماعة .
وأسألي القلب اللي عمال يُدق .
هو كاذب ولا بيصدق .
إزرعيني في قلبك زي النخيل .
واوعديني إن قلبك تملي يميل .
إوعديني إن الفرح آتي .
قلبي قلب لدكان ساعاتي .
كل شيىء جواية عمال يدق .
آه... نسيت أقولك بالأحق .
حبك فات ف القلب شق .
بقلم ( أيمن نصر )
