أنا خايف أنا خايف
***************
جناني خارف اجناني خارف
الا ما درت في الله رجايا
اجناني مكرب و محروث
الا استاعنت بزين العطايا
لساني ناشف لساني ناشف
الا ما ناجيتش مولايا
نطلبو و نخفت بالصوت
و ديما سترو يكون معايا
و رغم ذلك راني خايف
من ملقايا مع مولايا
اشكون فيكم آه يا الخوت
بظهر الغيب يدعي معايا
أنا خايف أنا خايف
نتردم بشلا خطايا
حيث كاينة فجأة الموت
و شكون اللي لغا بلغايا
حيث شايف حيث شايف
الفتنة كثيرة احدايا
راني خايف نولي مشموت
الا مرجعتش لمولايا
بعض المرات نكون تالف
كنسهى و نتبع هوايا
هم الدنيا يمشي و يفوت
و تبقى الحسرة و الرزايا
اعلاش نخمم و مطايف
و نجحد النعم و الهدايا
ياك اللي ارزق الطير و الحوت
هو اللي ضامن اعشايا
راني حالف راني حالف
احتى ندير الهم ورايا
و مع نفسي نهجر لافوت
و طريق الخير هي دوايا
حيث انا غريب و ضايف
بغينا معاكم نخرجو نقايا
شفت القبور كي البيوت
تفكرت كلام زين الوصايا
انا هنا بكلامي هادف
و رضى الله هو الغاية
نوعض نفسي بكلام منحوت
و لا ندخل سوق جوايا
أنا خايف أنا خايف
من ملقايا مع مولايا.
بقلم : النحات رضوان ضمان
المغرب.
