زي ناس كتير
...................
أنا زي ناس كتير
عايش يومي وحاطط حَد
لا بأذي ف حَد
ولا أخاف من حَد
فيها فرحه....أغني بجَد
فيها دمعه....الأيد ع الخَد
أحب الناس
مَا الناس للناس
مِش محتاجه جَذب وشَد
أحلى ما فيها هات وخُد
لا لىّ ف السياسه
ولا لىّ ف لاقتصاد
احب اسمع كتير
يعني بحب السُكات
بطاقتي ف جيبي واجب
ولا خُد ياد وهات
ولا فين وكيف وليه
وبَره البيت أبات
بَنام مِرتاح مغمض
مش خايف م الكلام
والليل إن كان حَريقه
ف الصبح تكون رماد
أصوم وأصلي وقتي
وأطول ف السُجود
أعيش مستور وأدعي
ع الشهاده اموت
ربيع عبدالظاهر
٢٠٢١/١١/٢٨
