القصيدة بعنوان ((الدنية دولاب الهوى ))
طبع الكحيلة اتعرف خيالها
والرعيع اتعرفه من .يدنالها
زلم تتسمه زلم بس غلطة هاي
وزلم ترهب لو يمر ....اخيالها
وجعة المفشوخ ما يبراهه طيب
اتطيب من تاخذ الفشخة عدالها
طبة الديوان سهلة عله الرجيج
لجن صعبة عله اليشيل احمالها
ميلة عكال البعض ضحكة وتفوت
لاجن الحسجة اليعدل اميالها
ناس عدهه الشرف سلعه وكلي بيش
وناس ترست من شرفها اسلالها
بالسمه النجمات يتشابهن حيل.
لجن كل نجمة تعرف...... اهلالها
الباع مرة شمرخص البيعة تصير
عنده عكس الجاع بس ما كالها
الدنية تفتر والعمر كلش كصير
الما فهمها ما يقدر...... احوالها
الغشمة بيهه الصعدت براس الفقير وامس تمسح بالردان.... أسبالها
باب ريحك سده بالك يستريح
لو تفكه تشيل كل........ اهوالها
الحره والجرة فرق نقطة الجيم.
والشبّه بيناتهن...... َِ.... شيالها
طيحة الميت لون وصلن الكاع
التنكسر كل طبه صدك... مالها
مستحيل الذيب يوم يخاوي شاة
شلون كلي اتئمن........ ابجتالها
الدنية دولاب الهوى ولعبة جهال
داس داسين وترد....... الحالها
صفّنتني الدنية.... كون ارجع زغير
جنت اشوف الناس حلوه اشكالها
وجنت اشوف الدنية لو كب التراب
تزعل وترعد وتمطر............ حالها
وجانت الوادم بخيته وكلهه جود
وكلهه تدبج لو طرب......... مهوالها
هسة شحجي ولو اسولف شرد اكول
لا تذريها وتهيج............... اجلالها
من صفت للمالهم عد بالرجال
اغسل ايدك منهه ومن......اعمالها
عمي ما ردنه البهيمة الكم حلال
ردنه منكم ولو بس.......... اجلالها
ما اريد احجي واطول بالكلام
حجيي يوجع والوكت......مو مالها
السالفة التنعاد تبرد بالحلوك
وفشله عل كلما يسولف كالها
الفاكد امه لو ابوه لا مو يتيم
اليتيم الفكد عزها....... وجالها
والله شكبان الحجي وحظني زغير
شرد اشيل وشرد اعوف ابجالها
ذبحة البسمة مثل ذبحة الطير
تحسبه يركص والركص يحلالها
وشهكة الميت وصية الكل
لبيب إلك يوم وشهكتك تبرالها
البرنو التمد زمرهه وما تجيس تصير عصة ويِلِّعِب............. باحوالها
الكبلي كال الناس تطرب عالغريب وانه اكول الناس مدري.....اشمالها
دومي الاول مو الاخير وروح ابوك
ولا صدّف يوم وصرته....بذيالها
النخوة ماتت والظماير جيب هاك
راحت العفة وبقه.........تمثالها
لا تذب اللوم عالحظ والنصيب
لَوٌّن زلمة وحوك كومك اسعالها
واخر احجاية ارد اكولن بالختام
الصاب هاي الناس من افعالها
الشاعر والأديب والناقد الدكتور المهندس سيد عادل غافل المشهداني
