/خلينا قراب/
لما تنورنا خدودك
هالليل يروح
ولو مرينا بورودك
عطرك بيفوح
والعيشة حد حدودك
بترد الروح
يرحم بيك وجدودك
خلينا قراب
***
بدفع عمري وتكوني
حدي ع طول
بغطيكي بريف جفوني
وعنك مسؤول
ياللي سببتي جنوني
وصرت مهبول
ببرم كل المسكوني/ة
بغمزة الهداب
***
يا لون والورد وعطرو
يا نور العين
توبك جنني زهرو
صرلي يومين
لو ينطر باقي عمرو
قلبي الحزين
مابيطفي نارو وجمرو
غير كتب كتاب
***
عيونك اخدو عقلاتي
خلوني طير
خدودك سرقو اوقاتي
شغلو التفكير
لو امك تبقى حماتي
ياريت تصير
وانت تصيريلي مراتي
ياغلى الأحباب
***
وأقفل قلبك عليي
وبيدي المفتاح
ونمضي هالعمر سويي/ة
كلو أفراح
ولما فتح عينيي
بكل صباح
بيكفي تكوني حواليي
والدنيا خراب
ببرم كل المسكونة: أبحث في كل الأرض /سويي: سوية او معا
محمد حبيب يونس سورية
