أم سليمان
مرت حدي تدلع
انا سكران
عيوني فيها تطلع
ست الغزلان
قلبي بلش يتوجع
دايب هيمان
ونبضو بلش يتسرع
طاير طيران
***
اجت نحوي تتنقل
عالدقة ونص
صرت فيها اتأمل
افحصها فحص
مشية غزال مكمل
احلى من الرقص
وعقلي ماعاد يتحمل
ح يصيبو جنان
***
خدودا شمعة مضواية
بلون النار
ووجها متل المراية
مافيه كدار
صرت اتلفت ورايي
بعقلي محتار
هيدي لعندي جايي
ولا غلطان
***
مسكتني الحلوة بإيدي
بكل التحنان
تراقص دمي بوريدي
ياربي أمان
حِكيَت كلمة وحيدي/ة
فت بحيطان
قالت منك ياسيدي
قلبي ورمان
***
قلتلا عفوا بالله
ياست الكل
اسم الله.عليكي وماشالله
شمس وبتهل
من الوردة انت أحلى
وأحلى من الفل
ومرتي لو حَدا قلّا
بتفجر بركان
***
ضحكت ضحكة طويلة
هالحلوة الشيك
قالت أنتَ هبيلة
عزا يطليك
عم دوِّر بالفتيلة
من ساعة عليك
أنا مرتك جميلة
أم سليمان.
محمد حبيب يونس سورية
بلش: بدأ / مافيه كدار: جميل لايعيبه شيئا / فت بحيطان: لم اعد افهم شيئا /عزا يطليك: شتيمة محلية / دوّر بالفتيلة: ابحث عنك
