يا مه قومى ........ وكلمينى
يا مه قومى ..... وطمنينى
ما أنتِ كنتِ ..... جنب منى
ورغم قـــــربك ...
كنتِ دايما .... توحشينى
*****
ما أنتِ ياما .....كنتِ يامه
بتشلينى ...... فوق كتافك
ولو ساعتها..... حد شافك
كنت بالصق .....جوه منك
تحضنينى ....... وتبوسينى
كنتِ دايما .........عند أكلى
بتمسكينى ......... تفهمينى
ده شمالك ........ ده يمينى
وفجأه يامه ... يقولوا ماتت
أوعى يامه....... تحطمينى
*****
يامه قومى .... من مماتك
واشحنى .......طاقة حياتك
من جـــــــــــديد ...
عوضى العمر .. اللى فاتك
لملمى جنبك ......... بناتك
بس أوعى .....يقولوا ماتت
لو بكينا ........... واتعمينا
إيه يفيــــــــــد ؟
ما أنتِ عارفه ......
كل لمسة ....... من حنانك
كان تاخدنى .... فى أمانك
أيوه يامه .....ده شىء أكيد
كنت باشعر.....إنو عمرى
كل يوم ........عمال يزيد
كل ضحكة..... جوه عينك
كنت أشوفها ... بألف عيد
كنتِ دايما ....
تخفى حزنك .. جوه منك
وترمى حملك ......ع المجيد
والنهارده .........جايه يامه
تجرحينى ...
طاب شوفينى ... زى عادتك
واسألينى ....
إمته يا ابنى .....رح تصلى
مهما طال العمر بينا
هياجى يوم .. وتموت تملى
أوعى يا ابنى ......
تنسي إنو ..... دى فريضة
هى جزء ......من العقيدة
ولو لديك .... معلومة تانية
قم ..... وقوللى
كنتِ دايما .... فى المناقشة
بتغلبينى
*****
فاكره يامه ....
يوم ما قلت .. باجيب بنات
مين يشيل فوق كتفه نعشي
لما أخضع...... للممـــــات
نفسي يامه ...يكون لى ابن
اسمه مدحــت ... أو زيـــاد
يومها رحتِ ..فى الآهات
وقمتِ يا مه .....ِ.. تدعيلى
يا رب ياجى لابنى واد
ومش سكتى .....
يومها قلتى ...قم وصلى
وادعى ربك ...هو قادر
يستـــجيـــب رب العبــــاد
كل يــــوم .... كنتِ تلومينى
وتنصحينى ...
أوعى يا ابنى تجيب مشاكل
كل خلق الله ......... بتمشى
بينا يا ابنى .... تقول هياكل
ولو تشوفها ..... ع الحقــيقه
والله يا ابنى ما حــد واكل
*****
ليه يامه ........... تفكرينى
ما كل فتره....... وليها جيل
جيل زمان ..... كــان رجال
كان بيركب ..... كله خيـــل
أما دى الــــــوقت المصيبة
رحنا نعلف..... فى البغــال
وانسلخ من بين صـــفوفنا
البخيل .... والعميل والكفيل
وكل تيس من خلفه ديــــل
وأنتِ رغم اللى.. احنا فيه
جايه بردو....... تشجعينى
وتقوليلي
شايفه فيك..... أحمد زويل
كنا نضحك ..بأعلى صوتنا
فجأة ياجى .... ليكى يامه
عزرائيــــل ...
لحظة واحدة .... يا ملاك
أخدت أمى ..... ليه معاك ؟
ما أنتَ عارف الخير طريقها
ولا أجيب لك .... ميت دليــل
قم وقوللى ........ بعد موتها
قلبي بس ........ لمين يميل ؟
قم وقوللى ......... بعد موتها
كيف هاسدد ....فى الجميل ؟
يا مه قومى ....... وارحمينى
وخلى صورتك ... تملا عينى
أوعى يامه ...... يقولوا ماتت
ليه مصره ........... تعذبينى
******
شعر / حمودة سعيد محمود
