من فوق رصيف
لإنتظار
واقف ومستني
النهار
والقلب عاود
لإرتعاش
بالحزن جايز
بالفرح ممكن
بالمناغشه
والهزار
بالكلام ف الحب
بشموس النهار
بالإنبهار
*************
وياخدني بحر الإحتمال
ويا الفروض
وتاخدني أحلامي
بوعود
بالرغم منها
برجع وأعود
محتار
بركان مشاعر
وإنتظار
تاهت ومن وسط
الطريق
رغم الحقايق
والوضوح
رغم النهار
أنا باختصار
معرفش منها قسمتي
إللي إنقسم
ولا إترسم
دا لإنكسار
جواه فظيع
نبعد نضيع
براه مرار
والإنشطار
يبدر بذور الضعف
في القلب الخضار
غاب النهار
عن كل دار
قلبي البرئ
إندار
شاف الأمل
صبار
وباختصار
إللي باقي مش كتير
والهم خلي الفرح طار
والقلب عايش
ف إحتضار
وأنا لسا قاعد
وأنا لسا قاعد
ف إنتظار
************
الشاعر محمد علي فرغلى احمد
نزلة باقور مركز أبوتيج محافظة أسيوط جمهورية مصر العربية
