عم بشندى
بقلم شريف شحاته مصر
عم بشندى فى جيبه حجاب شايله علشان يحرسه ويصونه
واخده هدية من الأحباب يحفظ نفسه بورقة تصونه
ورقة كاتبها شيخ كداب تكفيه شر حاسد بعيونه
وحجاب تانى تحت الباب تحفظ أهل البيت وتصونه
عم بشندى
إسم الشيخ مولانا بهلول بيقول عنه صاحب كرامات
له حلقة ذكر مع طبول بيرقص فيها وله علامات
صاحب حظوة وشرحه يطول وعنده ضريح لو طب ومات
لو شاف حد فى رقصه كسول يصرخ ويقول عنه حاجات
عم بشندى
يوماتى بشندى يروح الحضرة يتمايل فى الذكر براسه
لابس جلباب وعمامة خضرة وكتير ناس فرحانة بحماسه
يهز كأنه غرقان خمرة وصراخ عالى يقطع أنفاسه
وشيخ بهلول بالعمة الحمرا فرحان قوى بالذكر وناسه
عم بشندى
ياما الناس قالوا ونصحوه عيب يا بشندى وخليك ناصح
عابوا عليه أفعاله ولاموه عيب يا بشندى دة رقص مسارح
تعبوا فى نصحه كتير وسابوه فرحان هو بذكره وسارح
وأهل الحارة كمان هجروه قالوا عليه مجنون وما فالح
عم بشندى
