****
ديك البرابر باض
والفرخه بتأدن
العين ماليها عياط
ياربنا حنن
ابعت وهات الفجر
الصبر داب له حبال
بنشد ماييجي
داب نولي ونسيجي
والعين طواها الدمع
طفل القسي سنن
وكل سن بناب
ماعادش لي احباب
وانت ياباب كداب
في عذابي بتفنن
برواز صورنا انكسر
واتبعتروا الاحباب
دمع العيون اتعصر
ولاكلمه حتي عتاب
قالولنا بعد الصبر
تبقي الحياه عناب
قولوا لنا فين الصبر
مكتوب في اي كتاب
الصبر في غنوه
لحنها قلب ودأب
لو الحليب إتنسي
تلقاه لوحده راب
وانا دنيتي منسيه
مليانه بس قسيه
واللي انكتب ليه
مر شربته مناب
يسري عثمان
