عيب
بقلم شريف شحاته مصر
شخص وضيع مغرور بفلوس هو السيد واحنا عبيد
يذل الناس وكمان بيدوس فوق رقابنا بعزم شديد
نافخ نفسه كأنه طاووس ويوم ورا يوم الحالة تزيد
ماكينة تطحن وإحنا تروس ما تسمع منه كلمة تفيد
حال الناس كلها مش عاجبه مافى شخص مالى عينيه
يمط فى بوزه ويرفع حاجبه لو شاف واحد مد إيديه
وبعد شوية بيبرم شنبه وبكل تعالى يحن عليه
كأن شيطانه فوقه وراكبه يفسد عقله يوسوس فيه
لو شاف عامل عنده أجير شقيان واقف يمسح عرقه
يتجن ساعتها وعقله يطير كأنه بياكل ماله ورزقه
يكسر خاطره بخصم عسير والمسكين ساكت عن حقه
ربك يكفيك حاجة من الغير ولا مفضوح من أرزل خلقه
ياللى بتقهر خلق بمالك ونفسك منزوع منها الرحمة
ربك قادر يوقف حالك ويضيع عزك وسط الزحمة
ولا الحاجة ما كانتش فى بالك وسط نفاق الناس واللمة
ولما الحاجة تبان فى سؤالك ساعتها نقولها بقوة وذمة
