تعاله جنابك وبنفسك عرفنا ليه من شوفتك تحرمنا
بتروح وتقول عدولي ونسال نلقاك كانك ماجيتش ولا تعرفنا
بمناسبه إن بيجي ناس تمسك مكان ناس وبتغير الادوار
ابقي والنبي خلينا نشوفك وكلف معاليك حبه ياعم شرفنا
أصل بنسمع عنك خير اللهم يجعلة خير طبعاً ماقولكش
حاجة كده زي مابيقولوا والحكم بس اما نشوفك وتعرفنا
بس أمانة وانته معدي ابقي هدي وعلينا إرمي السلام
وبعدها إمشي ملهاش لازمة خالص انك ياعم تعرفنا
هما سالوني عنك وقلت والله بمعاليك ماتشرفنا
عشان قاعد بمكتبك مستني التقرير يجيلك
تقولك كله تمام و100%100 ياكبير
سيبك من ده كله وتعالة انزل شوف بنفسك
هتلاقي الدنيا بايظة والأمر خطير
والناس تعبت من كتر التفكير ماهو لو تنزل هتشوف بلاوي
بالزوفة والناس من الهم مكتوفة وكتير منهم حالتة متسرش انا خايف في الاخر يطلعوا خاينين ماهو كله مستني الفرصة ولاعدش فينا امين والحال موجود قدامك مدهور بقا نيلة طب والنبي نروح لمين ياعم تعالي وخلينا نعرفك
ولا احنا يعني مانشوفكش غير لما بتحصل عندنا مصيبة
بيقولوا سعادة البيه بسلامتة اتكرم وعلينا اهو جاي
وبنقعد نستني الموكب بالساعات دا الباشا بجلاله قدرة
نزل ولسانه حي هي النصايب بس اللي تبعتك لينا وتجيب
معاليك عندينا عشان جنابك تنزل من مقامك
وهنا تيجي وعلينا تمر لاسيدي بناقص ياراجل يانقص
مش عايزين نشوفك كفاية مُر
ايه يعني نشوفك طشاش زي اللي جه ومجاش
لابس طاقية اخفاء زي اللي حاطين علي عنينا شاش
مش عايزين حد يجي جنبك لتشدهم كهربتك
وتلسعهم نارك و تحرم عنيهم تشوف الضي
بقلم عبد المنعم مرعي
