فى الساحل
بقلم شريف شحاته مصر
فى الساحل بدأت حكاياته أغانى ورقص وسهرات
نعيش فى الهلس وتفاهاته وسفاهة رواد الحفلات
أقزام بتغنى ورقصاته ونساء فرحانة وعاريات
ومخنث فرحان بمراته مخمورة ودايرة بسكرات
مطرب بيغنى وبيبوس وبيحضن كل الستات
ورجال أقرب لجاموس لا فيه أخلاق ولا نخوات
كأنك بتشوف أوطى نفوس ويقولوا عليهم باشوات
وعجوز شبه أبو حلموس بيحب يعاكس فتيات
ناس ملعونة ما فيها دم ولا تملك جنس الإحساس
ناس بتموت من الجوع والهم يصرخوا فين الرحمة يا ناس
وخلق مدفونة من الغم إلهى تشربوا من نفس الكاس
أما عليهم لحم فى لحم ورقص وخبط ورزع فى راس
خفوا يا ولاد الملعونة كفاية فنون أقرب للردح
كفاية علينا زهقتونا خلوا فى عينكم حصوة ملح
ناس بتموت وناس مطحونة وانتوا ما نافع فيكم نصح
نفسى أشيلكم جوة طاحونة وأطحن فيكم كدة للصبح
زمان لو جارك عيان لا تحس برقص ولا أغانى
ولو شفت زميلك تعبان تعيش بألامه وبتعانى
مش ترقص زى التعبان وكأنك من كوكب تانى
وترقص عريان مع نسوان إمتى تكون راجل يا أنانى
فالحين بس تدقوا وشوم وتلبسوا فساتين مع حلقان
دى رجالة يا عيب الشوم فيه أرجل منهم نسوان
عايشة تكافح وسط هموم ست بميت راجل بتبان
وناس بتناضل عالم مسموم مش زيك ترقص يا جبان
أمة تباد عن بكرة أبيها ودول بيغنوا ولا حاسين
لا فيه نخوة تأثر فيها سكارى ومساطيل مش شايفين
ولما حييجى الدور عليها حنشوف رجالة بفساتين
وتخرج مصايبها وبلاويها ورؤوسكم تتمرمغ فى الطين
