بحر الحلال
ـــــــــــــــ الصافي أبوعمار
ليه تحدفيني في بحر صعب ؟
وترغميني ... لوحدى أطب
هو اللي كان ما بينا حب !؟
ولا وهم خدني لمشنقة !!
وبقيت في عينك كالهلام !
فين المودة والاحترام ؟
طب فين ثمار الإنسجام ؟
كان حلم عشته ...
صبح كااااابوس !
لما انتهت مني الفلوس !
دا انا ياما كنت كما الفانوس
بتهمسي له يغرّقك ....
فساتين ...
جواهر ...
مكياجات ...
دلوقتي بح....
دا كله مات
طب فين بواقي الذكريات ؟
ووعود كتيرررر ....
وأمنيات
خانك ضميرك وانتهت
كل الفصول ....
صبحت سكات !!
ما تقولي ايه اللي غيرك
بعتي اللي شاري وقدرك
بكره أما يجي هأفكرك
بالسر في فهم الآيات
روحي خلاص عني ابعدي
قولي جبان أو مفتري
ميهمنيش مين يشري
بس بقولك .. أبشري
اياك لعندي ترجعي
وعيالي عني ميبعدوش
واعيا لكلامي.....
مبكرروش
ولا عدت ازوق في الكلام
رسالتي وصلت والسلام
اياكش اشوفك في الشمال
أو في اليمين حاضنه الخيال
ما هو انت برضه أم العيال
والعيبه تجرح قلبهم
دا انا افضل اني اسمهم
ولا حد يذكر امهم
تلحق تابوتهم ضمهم
قبر البلايا ....
لأنني
فكرت اعيش زي الرجال
ما امسحش جوخ
ولا اذل حال
خليني في البر الحلال
ما اعرف اعوم يأم الدلال
#الصافي
#اسوان يونيه 2022
