وگلت ماخلي واحد غيرك يشله
متعود عليك اشگد الك طعنات
حسبالي مثلهن هاي مو سهله
كلفه وحيل توجع وصلتني الموت
وخلتني رچيچ الحال وبذله
وإنته العين تضحك والگلب فرحان
وي ذاك الخذيته ورحت تتسله
حيل اتندمت يل گتلي الله وياك
حسبالك اموتن قهر لوعله
دلوني عليك اوصلت الاخبار
رقم البيت جبته الشارع اندله
وعناوينك خذتها وخطك الشغال
ما يصعب عليه وجيتك سهله
اوصل بالنهار وموش باخر ليل
شايفني گبل طبيت بيت اهله
ماهاب الخطر وأسحگ على الجمرات
حسبالي ثلج وتزحلگت لاجله
طلع نار ابهشيم وهفتاها الريح
الحسبته صلب ساسه طلع وحله
بقلم السيد حسن رزاق عزام الصافي
