''''''''''''''''
ألگلب يهوى الترافه وكثر بشوگه
وعلى خدودك گمر والشامه مدگوگه
الشفايف رطبن والديرم محليك
المغطى استوى وهالدلن اعثوگه
يالزرعك لحگ يالسنلبلك متروس
حل موسم حصادك وارتفع سوگه
تعال وخل اهد عليك منجل شوگ
ما ضايگ حصاد ومشتهي يضوگه
يخصرك چن غصن رمان مبعد ليش
تعال بملگه عاشگ شاف معشوگه
على اطراف الكصايب شفت طايح ليل
وفوگ اعله الزنود شموع معلوگه
يالكلك ترافه وبيك طبع الماي
فيض اعله اليحبك وامشي بعروگه
فيض بكلشي عندك يذبل من الجيس
وساعتها النده البشفافك انبوگه
توفيق حيدر المالكي
