فين لما كنا صُغيرين
بقلوب صافية كلها بياض
جبنة معجونة باللبن الحليب
قبل ماتتملي بالصفار والنفسنة
وتصبح سودة زي البلك طين
فين ...وفين ......وفين
لما كنا نمشي بالشارع
جنب بعض مشبكين الايدين
الله عليها الله وعلي ايامها
اللي كانت فيها الدنيا جميلة
والحياة بسيطة مفيهاش غيرة
الكل علي بعضه كان بيخاف
وفي طيبه قلوب ناسها بيحلف
عمره لو بعد كام سنه ماشاف
فين لما كنا صُغيرين
كان جمال القلوب
واخد جمالة من روح الطبيعة
اللي كانت زي ازهار الربيع
بالود والورد مفروشة ياسمين
فين لما كنا صُغيرين
عشنا الحياة علي طبيعتها
وكانت عايشة فينا روح ناسنا
الغلابة الطيبين
اللي عمر ماغرتهم الدنيا
رغم مظاهرها الكدابة والألوان
معروف عنهم الأصل والطيبة
ومجدعة ابن البلد المحافظ
علي الادب وحفظة لكتاب الدين
فين لما كنا صُغيرين
بنحب بعض قوي والحب متين
عشان عارفك وعارفني
وساكنين جنب بعض من سنين
قلوبنا علي بعضها تسلم
قبل مابنسلم علي بعضنا بالادين
فين لما كنا صُغيرين
بقلم عبد المنعم مرعي
