…
يارجل شبك بيكفيك تغريد برات السرب صحي تغريداتك بيجننوا كتر مو حلوين وبيني بينك أنا بيعجبوني ... بتعرف بس أقعد بيني وبين حالي وفكر فيهن أول شي بيتعبوني قصدي بيتعبوا دماغي .. كيف يعني .. بحسن كبار كتير ودماغي صغير كتير وبحاول وبشتى الوسائل دخلن وأحشيهن بدماغي أبدا .. أبدا مابينحشوا ولا بيساعن .. وبتعرف فعلا بيسبيبلوا دوخة .. بضل معي شي يومين .. بتعرف شو بعمل .. بمسك تغريداتك وبكبن برا وبحلف ماعاد أرجعلن بهل عمر كلو .. ولك يابني آدم بتعرف شو بيصير معي .. بعد ماأصحى من الدوخة هي تبعيت اليومين .. مابعرف شو بيصرلي بركد ركيد وبروح جيب تغريداتك من محل لكبيتن وبنفخ عنن الغبرة وبحطن قبالي وبصير بحلق فيهن يعني أتأملن .. كائنن بيدعوا للتأمل
والمصيبي السودي .. أنو كمان هادا التأمل بيسببلي وجع بالراس وبعدى باخد حبتين ( سيتاكودائين ) ليصحى راسي فبقوم بعصب وبرجع كبن برا لتغريداتك وبحلف ماعاد أرجعلن وبرجع برجعلن .. فا يرحم بيك بيكفي تغرد خارج السرب ..
#ياأخي .. شو بعمل بحالي حاولت غرد جوات السرب .. بتعرف شو صار معي .. خربطت تغريد السرب كلوا وقامت ضدي مظاهرة بأنوا أنا لازم أخرس برأي السرب وماعاد أفتح تمي وتهموني بأني نشاز ومابعرف غرد وكتير أحيان حرموني من الطعام وأحيانا يعاقبوني بأني نام لوحدي على شجرة بعيدي عنن يارجل مو بس هيك نتفولي من ريشاتي ست سبع ريشات عقوبي قال منشان أتذكر وبطل غرد وماأغضر بطل ينتابني الشوق وأرجع ع التغريد وأرجع أتعاقب .. بعدين وحياتك هربت وصرت غرد برات السرب لحتى شرفت حضرتك وبدك كمان تمنعني غرد .. بربك شو بعمل بحالي .. هات لشوف .. نصحني برحمة بيك..
#أنا برأيي بطل جوات وبرات السرب ..
وكول ............................ هوى ..
…
سمير عرب
