الدگه هاي البيك شامه ابحنچ لوه
بل گلب شبت نار ظل يصرخ احوه
،،،،،،،،،،،،،،،
شحلاته دگ البحنچك وشملاك
وسولف سكته وي روحي وشملاك
يريتك رازقي اتخظر وشملاك
بداري وينتعش كل كتر بيه
،،،،،،،،،،،،،،،،،،،،،
طعم اشفاك احسهن شهد وطران
دليلي والجهلهن خبل وطران
اما مرن اطيوف الشوگ وطران
عليك وريتك بكل حين جيه
،،،،،،،،،،،،،،،،،،
شحلاته مبسمچ سنچ ويابان
وداخت بيچ امريكا ويابان
شكثر نسوان من طلگن ويابان
فلا جابن مثل شكلچ اليه
،،،،،،،،،،،،،،،،،،،،،،،،،
اعيونك كل بريق النجم قدحان
وعطر خديك جوري وياس قدحان
الا تعلم طلوع الفجر قدحان
ابرجاكم والشمس طلعت عليه
،،،،،،،،،،،،،،،،،،،،،،،،،،،
نسيم الهاب من فيضك وردلاي
وشتل بيه غصن جوري وردلاي
جرب عوفني وهاجر وردلاي
ابنفس العطر عطرك ظال بيه
،،،،،،،،،،،،،،،،،،،،،،،،،،،،،،،
نسيم الهاب من فيضي وردلاك
واذكر چم اكتاب انخط وردلاك
شجاني اتخبلت عمي وردلاي
وعطر غيري بثيابك هب عليه
،،،،،،،،،،،،،،،،،،،،،
النودهم ليش مقصدهم يدلعون
الثياب وصارو اگبالي يدلعون
انه المديتله ايدي يدلعون
لواها وصافح اليحچي عليه
سلام المرياني
