كتبنه اشعارنه ولازم انوثقهن
وحده أحلى امن الاخره بفكر صايغهن
الاصيلات انتنومس بيهن انودهن
وذا بيهن غلط مبخوت نحذفهن
مثل الخيل غارن حلوه غارتهن
وذا ضلن ابتالي الخيل نعزلهن
وبمرود الحسچه خل نكحلهن
مثل زفت العروس ابفخر ونزفهن
وعدنه اقلام ما واحد وصل حدهن
من دم الگلب محبرت نازفهن
تراث اهلي هذني واجب احفظهن
وبعلو النجوم العاليه انعدهن
من كاظم الگاطع من حلگ عريان
فازن بل سباق اوچانن اولهن
لاگطهن لگط بيدي أميهولهن
مابيهن الوذره وبشر ناقدهن
على كل الصحف وبمجد ناشرهن
مثل الگطن بيض وما موصخهن
من اجمل بحور الشعر شاربهن
وعلى عقول الحكيمه بثمن بايعهن
هاك أسمع حچيهن گوم وفهمهن
وتحداك اذا تگدر اتجابلهن
عرايس والفشگ شوباش طگ الهن
اعله كل ألسان كون تريد تسمعهن
ورد وبطين حري بچفي شاتلهن
ومن فاحن عطر ياهو الي ميشمهن
اذا اهدهن صعب ياهو اليچتفهن
يحبني لذلك وانه احبنهن
،،،،،،،،،،،،،،،،،
سلام المرياني
