--------------------------
قهقه الرعد و زاد نبرة ضحكتو
و البرق لَمّـعها زيادة بسمتو
لكن الغيم ال سابح بقرص السما
أنهار نـزّلها غزيرة دمعتو
و بحضن لفحات الهوا التلج ارتمى
ما قدرت اتحمل برودة صقعتو
رياح و عواصف هادرة مستسلما
لأمر النبي سليمان أصدر كلمتو
ما عاد يجري في شراييني دِمـا
الجو جَفَّـف و البرودة جريتو
و معزوفة سناني بإيقاعا كما
أوتار بيتهوڤن بحفلة سمعتو
بيرتحف جسمي متل رقصات الدُمى
أو مس جنية بكفها صفعتو
و عابابها ملطوع واقف مثلما
شحاذ ناطر تا يحصل لقمتو
حسيت دَيي صار فيها أكزما
كفي ارتخى و عالبرد ذبلت همتو
دقيت بجفوني رح يجيني العمى
نار و تلج و القلب تعلا دقتو
فَتحِت ..دْخلت و حالتي رح يصدما
من اللي جرالي و من ال يللي شافتو
و لوما بدفاها و حضنها قلبي احتمى
عالقبر كنتو رح تضووا شمعتو
الشاعر د. علي مسلم عجمي
لبنان
