كوابيس
من فترة بعيدة وطويلة في منامي أشوف الكوابيس
أحلامي بقت صعبة تقيلة أصحي من نومي وانا تعيس
لو شفت عروسة حلوة جميلة معايا في الكوشة وأنا عريس
تقولي جاك ستين نيلة روح شوفلك زفة بمتاريس
أو أشوف نفسي قاعد في عزومة وموائد فيها فتة ولحمة
وناس وخلايق ياما معزومة وانا ضارب ميت ستين لخمة
وأمامي أطباق ياما مخرومة والشوربة بتسقط من الزحمة
وغراب ياكل جنبي مع بومة بياكولوا طعامي بلا رحمة
أو أشوف نفسي قاعد في مصايف تحت الشمسية أمام بحر
وناس بتعوم جنبي وشايف أجواء ممتعة تشبه سحر
ورياح فجأة تقوم وعواصف وأنا وحدي قاعد علي البر
وموجة عالية تشيلني وانا خايف وتشيل في رقبتي وبتجر
أو أشوف نفسي جوة البير ومش لاقي حد بيسمعني
فجأة ألاقي كنز كبير وأصرخ علي حد يطلعني
تطلعلي أفاعي ودبابير بتلدغ لحمي وتوجعني
وإنسان قدمه شبه بعير بيشاور ليا يودعني
بقلم شريف شحاته
