علي نغمة تانجو
بقلم شريف شحاته مصر
سافر وسابني والشوق غلبني من يوم ما سافر الفرح فاتني سافر وسابني
من يوم ما فاتني وسافر بعيد سهران بجرحي حيران وحيد
أقول لروحي يمكن يعود أستني يصدق مرة في وعود وليالي ترحل وقلبي صابر يقولي إنسي دة قلبه غادر
إزاي راح أنسي وحبه جوة ساكن في قلبي ينبض بقوة
إزاي أهون عليه يسيبني من يوم ما سافر الفرح فاتني سافر وسابني
أيام تعدي وشهور تمر من غير سؤاله والجرح مر
لو بس أعرف كان ليه غيابه الروح بتنزف من طول عذابه
أو حتي يبعت همسة في رسالة يشرح لي ظرفه أو حتي حالة
من كتر شوقي نفسي يعاتبني من يوم ما سافر الفرح فاتني سافر وسابني
قلبي الوحيد ينبض بحبه سهران لوحده يتمني قربه
لوعة فراقه بتهد فيا يسعد بوقته والحزن ليا
روحي تقولي أصبر شوية أيام تعدي والفرحة جاية
أكتم في ألمي ودموع عينيا والصبر طال دة كتير عليا
تغيب عليا من غير وداع لو غلطة مني إرجع حاسبني
سافر وسابني والشوق غلبني من يوم ما سافر الفرح فاتني سافر وسابني
