((( عواقب الإحتفالية )))
فاكرين
فاكرين الغدوه إياها
والدبله وإللي حصل معاها
وأم العيال
ف بيت أبوها
وست الكل حماتي
ماسكه ودان مراتي
كاني وماني وتهاتي
الدبله يا مفيش مرواح
وأنا فرصه راح أرتاح
ع اللقمه والهدمتين
البركه ف بناتي
وأولادي الأتنين
**************
والعيال عملوها مناحه
أمنا يا منجيش البيت
ولبسوني أنا ف الحيط
خلاص مابدهاش
سحبت قرض
ع الكام شهر
باقيين للمعاش
وإشتريت دبله
وعبايه خروج
تعيشي وتدوبي
يا أم محمود
**************
وحماتي تبصلي
من فوق لتحت
جيت بالعين الحمرا
كان لازم الشخط
صعب عليا أول مره
روحنا البيت
وأتلموا أولادي
وأحفادي
وسلمي بنت ولدي
إفتكرنا بحاجه يا جدي
ومحمد ولد ولدي
خلاص يا بت
كفايه عليه الجده
يا أولاد أنا جاي م الحج
أنا خايف م القرض
وسداده
لازم يتسدد ف معاده
وأنا المدبوح
ومني متلبشه الجته
وكل واحد عايز حته
وكل واحد عايز حته
*****************
الشاعر محمد علي فرغلى احمد
نزلة باقور مركز أبوتيج محافظة أسيوط جمهورية مصر العربية
