فن
بقلم شريف شحاته مصر
فنان أنا غاوى التلحين وفوق التلحين برضه أغنى
موهوب وفى عملى رصين محتاج الناس تفهم فنى
وما أحب أغانى التافهين بس الفرصة بعيد عنى
راح فين ذوق السامعين لو واحد بس يفهمنى
قالولى إمشى مع الساير وكلها إسمها مزيكا
مش لازم تنقد وتعاير ومش لازم نهاوند وسيكا
غنى الحان فيها بشاير وإتعلم من السيد شيكا
خبط ورزع على الداير وبكرة تغنى فى أمريكا
فى التافه قلت أشوف بختى وأصرخ وأغنى مع الرقص
غنيت أغنية إسمها ياختى ولحن موصوف كدة بالهجص
هدايا بقت فوقى وتحتى من غير لا رقابة ولا مقص
والناس بتسقف مع تختى وناس ترقص على واحدة ونص
ودخلت مسابقة أمام لجنة وغنيت أغنية إسمها عايز
سفيهة وأشبه باللعنة يمكن أكسب منها وجايز
وناس رايقة قاعدة تسمعنا ورئيس اللجنة إسمه برايز
قالولى يا بخت اللى سمعنا راح تحصل منا على جوايز
من يومها بقيت فنان عالى محسود على فنى وهدومى
البس من الفاخر والغالى والناس فرحانة بألبومى
مشهور فى مسارح وليالى ويا فرحة قلبى كمان دومى
وفنى بقى زى تسالى والفن التانى راح بهمومى
