الرُّوحْ رَايْحَة رَايْحَة
والذَّاتْ فْالقْبْرْ طَايْحَة
لَازْمْ يْتْحْدْ العْمْرْ
تْنُوحْ فْيُومْ النَّايْحَة
بْالدْمٌوعْ عْلَى الخْدْ سَايْحَة
وْتْعُودْ لْمَحَبَّة صْبْرْ
يَادَارْ بالخُبْثْ فَايْحَة
عْشْقْنَاكْ وْنْتِي جَايْحَة
وْنْسِينَا يُومْ لْحَشْرْ
شْلَّا مْنْ شْبَاكْ لَايْحَة
فِيهَا لْعْبَادْ طَايْحَة
لي خْطْوَة فِيكْ يْعْثْرْ
الِّلي شْرْبْ كَاسْكْ مَاسْحَى
خْسْرْنَا وْنْتِي الرَّابْحَة
بالذْنُوبْ كُنَّاشْنَا عْمْرْ
يَادْنْيَا دَايْرَة رْحَى
نَارْكْ لْهِيبْ لَافْحَة
گادْيَة وْتْزِيدِي جْمْرْ
يَادْنْيَا لَا مْسَامْحَة
فْعْرُوقْ الذٍَاتْ سَارْحَة
خْسْرَانْ أُو تِيهْ أوْمْكْرْ
النَّاسْ فِيكْ مْلاَوْحَة
نْخَّاتْ بْلاَ مْقَاوْحَة
هلاك يَاعْصَابْةْ النْظْرْ
نْسِينَا رْبِي وْمَا وْحَى
للنْبِي وْحْتَى الفَاتْحَة
أًمْ الكِتَابْ وْالذْكْرْ
نَاسْ شْفْتْهَا مَازْحَة
أُو نَاسْ بْالهْمْ شَاطْحَة
أُولْنَاسْ تْقَاضَى الصْبْرْ
يَادُنْيًا لاَ مْسَامْحَة
مًافِيكْ طْرِيقْ وَاضْحَة
لبْصِيرَة عمات وْبْصْرْ
#ياسين عبدـالله ـالجهوري
