--------------------------
دقوا طبول الفرح وَدَّعنا العام
بزَفِّة عروس مكَلَّلِة بورد الخزام
منكسر جرار الأسى خلفو و الهموم
فراقو فرح و سرور بيعم الأنام
إرحل و يرحل كل شي جبتو معك
خصوصي ( الحروب) و قولها تا تتبعك
لكن حذاري يكون في عندك ولد
تورِّثو الجبتو و كلامك يسمعك
وين ما بدها المآسي عم تفوت
يا عام فارقنا العالم عم تموت
خايف بعد منك يجي العام الجديد
بالغَم متلك يدخل ديار و بيوت
نقَّصِت من عمري سنة العام الجديد
كيف بدي استقبلك و اعملك عيد
كبرتني و شيبتني و ختيرتني
ما بتنهضِم تا نقولها عامك سعيد
كيف بدي عَيِّد بأول العام
و أطفال عم بتموت ما لاقت طعام
و عا جثث أطفال و نساء… بيرقصوا
الما عندهم لا ذوق حتّى و إحترام
يا عام ليش قلوبنا بتدوسها
و فيك المصايب قَلَّلِت ناموسها
عالقهر ما فـيي ولادي ضمها
و لا إيد بيي و إيد إمي بوسها
ناس تسكَر..ترقص و تلعب قمار
و ناس جنب القبر عَتَّمها المزار
و ناس مكتئبة و لوحدا عايشة
مش فارقة لا عيد معها و لا شحار
عنا الدولار ارتفع تا وِصِل السما
و الكهربا بعهدك.صار ضاربها العمى
لا غاز لا مازوت في فصل الشتا
و مع قِلّة البنزين أصبحنا دُمى
قالت سامحني في نعومة و ولدني
من قبل ما رلس السنة يزور الدِني
بسامحك..ما بسامحك مش فارقة
كل يوم مساقبة راس السنة
يا ريت يا راس السنة الجايي جديد
تهل بالخيرات حتّى تكون عيد
و ما في حروب و ينخفض سعر الدولار
ت بصوت عالي نقولها: العام السعيد
الشاعر د.علي مسلم عجمي
لبنان
