هم گلي انته شلونك
والروح خضره وهم تحب
خضره بخضار اعيونك
صح بيني وبينك فرق
لوني عكس عن لونك
بس اليحب مو بالشكل
كون بمحبته يصونك
هسة اتيقنتهن مو أضغاث أحلام
والشفته أبمنامي أصبح حقيقه
يجي أغراب ويشيلك مني وتروح
ويذبل وردي وتموت الحديقه
لو اعصر خمر وسگيك بالليل
چارجعينه محبوب وصديقه
هذا الكاتبه آلله ولابد يصير
أنصلب بالحب واضل بنص طريقة
حلم سبعة سنابل خضر ماجيت
ولا راويتيني الطله الانيقه
حلمت بيابسات وحلمي مو خوش
اذاً ماكو عسل لا كو صديقة
جميل اشماگلت وشماعتب لاح
يمن نكتب قصايد عالسليقة
أخاف اعليك من أقراك مرات
أخاف اعله النفس يوگف شهيقة
دخفف للعتب لاتوجر اهواي
تره بعض العتب يصبح وثيقة
مثل طبع النحل خليك يفلان
يغازل للورد ويمص رحيقة
وانت امن الورد بالاف مرات
حلو وشفاف چلماتك رقيقه
خدك ناعم وبالليل ينشاف
اخذ من الگمر لونه وبريقه
لابل الگمر انت وحلاياه
توم اوياه وأكثر من شقيقه
أنا گلبين بيه وموش گلبين
اذا دگن سوه شبت حريقه
أريد وياك اسولف ولو بالطيف
اذا تسمحلي من وقتك دقيقه
بِـــقَـــلَـــمٍ ️ Tawfeeq Haider AlMaliki🇮🇶
