يالير الحميدي الينذخر للعوز
يالاصلچ ذهب صافي اربعه اوعشرين
ياچلاب شيلة وللحسن مصيوغ
امي وبيش اوصفچ وارد احطچ وين
الوگه الشلتيه ابراسچ تاج فوگ الراس
شال اسنين عزنه لاسنه وسنتين
يم چلمة هلا ترحب بكل خطار
وبدار الضيافه تحيري شتقدمين
يمدرسة الاخلاق من الزغر للشيب
ربيتي وتعبتي اونبچي وتلولين
كرامه انطاج ربج وانتي فوگ الكاع
تحت رجليج جنه اليخدمج تنطين
ياشهگت نفس وانه ابمرد انفاس
يا خبزة كرامة البيها قنعانين
يالچفچ يدوف الطين والنفاش
حري وطابگج عايش اويانه سنين
تشگين السمچ گطان مال الهور
ابجمر مطال چانونچ سمچ تشوين
مامر ضيج بينه ولا عرفنه العوز
اثياب امفصله تفصال وتخيطين
الف رحمه عل روحج ياعجيدة راي
يابت الشرف يامنبع الطيبين
،،،،،،،،،،،،،،،،،،،
سلام المرياني
