لازم تقعد معايا شويه
وتسمع كلامى العجيب
وتتخيل بكره وانت بعيد
وكل اللى عارفك
وشافك
وسمعك
وكان لك صديق
أما حزين لبعدك
وأما سعيد
لانك بعدت
وفسحت له الف طريق
ولما تفكر شويه ببساطه
تلاقى الحياه اخر تفاهه
مسخرة بارده
وحرب ب سذاجه
على وهم و سراب
وحبة تراب
وشوية مظاهر
و كام كرسى مكسر
سبقك إليه الف غريب
ورجع اليك صدفه
مش لشطارتك
ولكن لأنه نصيب
بحكم ترتيب المواقع
وامتحانات الذكاء
وشروط القبول
وفكر وذكر أن اللى شاطر
يفهم ما بين السطور.
يقعد يركز فى اللى فاته
و ينقى الحقائق
و يحدف الكذب بطول الدراع
زى حصوه فى بحر الخداع
ولو زهقت من كلامى
فارق وبكل هدوء
و كمل حكايتك لوحدك
وراجع تاريخ الميلاد
وشوف اللى فات
وشوف اللى باقى
وهات مساح الأراضى
يقيس لك المكان المتاح
وفكر بياع الروبابيكيا
وكل قديم وهالك
بمكانك الحالى و المتاح
لعله بعد رحيلك
يرجع يلم اللى سبته
ويرمى ملاليم لاصحاب المتاع
.ويأخذ وهو زاهد
فى أيده بجره مميته
كل ما كنت تتخيل و واهم
أنه له قيمه وسعر
واستحق الشقا ويا الكفاح
.صور بطولاتك وانتصارات
والجوائز والضيوف
وانتصارات بحق وشرف
ولا بباطل لأجل
الظهور والغرور والفوز
على منافسك
ووهم انك بطل انتصر
بشوية كلام اتنسى
زى فقاعات الهواء
ولعب العيال
حتى العيال
صبحوا شباب ورجال
ونسيوا كل اللى فات
ومنتظرين نهاية المراسم
و تحويل كل اللى سبته
لعمله تستحق الإيداع بالبنوك
أما ايه اللى سابوا فلان
مش مهم قيمته .
.المهم عند المالك الجديد
خامته ايه ؟؟
و ثمنه يجيب كام جنيه ؟؟؟
وتحويله فلوس تنفع لعب القمار
مستغرب ليه؟؟
ماهى الحياه
ببساطه ووضوح
كلها لعبة قمار
وقرار و أختبار و اختيار
وسؤال كله حيره
والاجابه
اصعب رد من السؤال
وتلف الأفكار جوا الدماغ
وتخطف النوم من العيون
مجنون انا
انى بفضفض معاك؟
زهقت ولا خوفت
ولا قايم تنام؟
هسيبك تكمل نوم
بس ..لو عرفت تنام
بس بيقولوا من زمان
أن اللى باله مشغول
عمره ما نام
ولما ينام عقله صاحى
ويحسب اللى فات
واللى جاى
واللى مش عارف له حل
من كتر الأسئلة طول النهار
..اسيبك تنام ولا نكمل كلام؟
محمد فوزى العليمى
