..............
بعيدك يا أمي
..............
يا أمي شُوفي العالم ملتمي
بعيدك يبست الكلمه عاتمي
ما عاد في إلها معنى الكلمات
بغيابك نشف بشراييني دمي
قومي بعينك شوفي الفرحات
كل الدني بعيدك مهتمي
شقي اللحد زيحي الترابات
بكفوفك بقايا زهر عمرك لمي
هون الفرح والدق والرقصات
وهون زهور حضنك منشمي
وهون بيوت عامري بالهيصات
وهون الورد يتقدم إلك ضمي
إلا أنا عايش مع الدمعات
وجروح تزيد بالقلب غمي
لا أم تفلش إلي جناحات
ولا لسان يخفف عني همي
قومي يا أمي سمعي هالأبيات
وكفكفي دمع جرح قلبي مدمي
قومي حضني أبنك بطهر الديات
تأصعد معك على أعلى قمي
جيتك زياره وقاصد الجنات
لعلوا القلب يشفى من الحِمي
قلت يا شعر أكتب الأيات
بِدي يدمع عطر من الكمي
سبقني عالقبر فوق القبر بات
قبل مني صار عا أمي يسمي
صرت شمشم ترابك وبووس الحبات
بدموعي أغسل حجر لحدك وأدعي
الله يحرم الحياة الحرمني من أمي
............... ................
بقلم الأديب والشاعر يوشع علي إسماعيل
