الشاعر صبرى عبد الواحد الحسانى
صاحب السوء
الصاحب السوء
مكسبه بيكون خساره
يأذى فى خلق الله
وفاكرها جدعنة وشطاره
اوعاك تصاحبه ولا تماشيه
ولا فى يوم تدخل داره
ولو عطشان عطش الموت
اوعاك تشرب من انهاره
دى ميه كلها سم
دى طعم ومحطوط فى سناره
صاحب السوء يا ولدى
مشيته معاك بخساره
يجرك معاه للسوء
ويحقد على كل من زاره
ما يتمناش ليك الخير
وعايزك زيه فى حقاره
علشان ما تكونش منه احسن
خصوصاً لو كنت قريبه أو جاره
صاحب السوء ممكن يكون
فى عمل أو دراسه أوفى الحاره
تعرفه من كلامه وأفعاله
اللسان حلو ومرة أفعاله
يفرشلك الأرض ورد
ومرة واحدة تشوف القذاره
نصيحتى ليك ماتماشيهوش
ولا تدخله دارك ولا تدخل داره
