الشاعر صبرى عبد الواحد الحسانى
وصيه لولدى
ياولدى لو فى حد مزنوق
اوعه تتردد تساعده
واوعه تخلف يوم
وعد مع حد واخده
ولو صديق احتاجلك
اوقف معاه وسانده
واوعه فى يوم سائل
تكون فى يوم راده
ولو حد طلب شهاده
فى الحق كون شاهده
ولو صاحبك ضل طريقه
بايدك خليك شاده
وكتر صحابك وعدوك
لو طلب مساعده ساعده
ولو اتعمل فيك جميل
اوعاك تبقى فى يوم جاحده
ولما تصارع صارع اسود
وعد عليك أنا واخده
والخاين ما تنزلهوش
ولو طلعلك صاحب ما تاخده
وصيه لولدى
وعلى النبى صلى
طول ما فى وقت فاضى قاعده
ونور طريقك بايدك
مش بنور من حد واخده
وابنى ما تهدمش
واللى يحتاج مساعده ساعده
وخلى كلامك اصولى
والصغير خليك كوااده
والكبير فوق راسك شيله
سعادتنا احنا فى سعده
ولسانك حصانك صونه
وما تخليش حد يراجعه
وصيه لولدى
خليك سيد نفسك
وان شفت خير زيده
خليك فاكر ياولدى
ربك احنا عبيده
المال ليبقى سيدك
لاما تكون سيده
اوعاك فى يوم الخسيس
تحط ايدك فى أيده
وصيه لولدى
ما تقولش أنا وانا
وافتكر أنت من تراب
واحفظ سر صاحبك
حاضر كان اوغاب
وخلى حوليك دايما
اصحاب ليك وأحباب
واحذر صديقك قبل عدوك
وخصوصا لو كداب
ودع الملك للمالك
اخرتها جنه أو عذاب
اوعاك فى يوم تساعد
حد ناوى على خراب
وسامح من يعتزرلك
ربك غفور تواب
لو كنت سليم النيه
ليك الجنه من غير حساب
ربنا يبارك فى أولادنا وبناتنا وتلاميذنا وتلميذاتنا
ويحميها ويحصنهم من كل سوء وشر
وصية لاولادى
صبرى عبد الواحد الحسانى
معلم بمدرسة الإصلاح الزراعي بنجع حمادى
