فينك يا وقت الخير يا زمان النية
فين الضو فالعين والقلوب النقية
فين الخواطر صافية والضحكة صفية
فين الحشمة فين الوقار والنية الزكية
فين الجار اللي كان ستر وسند فالقضية
فين ليد فاليد وسلام بلا كراهية
فين المسيد عامر والوليدات نقية
فين اللي يحشم قبل ما يدير الخطية
اليوم ولينا نشوفو العيب فالعليّة
واللي سكران كيعطي فينا الفتوية
الحق كيبكي والباطل فالهنيّة
واللي صبر بزاف مات وسط الوصية
شوف الخصومة دارت فالخبزة سبية
والمسكين تايكوي بحروف الشقية
واللي قال الصدق يشوف العين غضبية
واللي نافق ولى فحكمو ملكية
اللي بغى يصلح يطيحو فالقضية
واللي سرق دار لباس القدسية
فين الدين وغيرة وطنية
فين الضمير وفين لمّة العائلية
بغيت ندوّي ولكن الدمع فعنية
بغيت نغوت والحيط رد عليا
بغيت نهرب والوطن باقي فنية
وكتبت زجلي باش نقول شوية
يا سامع الصوت راك فالحال معنية
ماشي غير حكاية راه دمعة خفية
راه زجلي صرخة من قلب فالرعية
كتبت وجعي ماشي باش نبان فالهويّة
راك تفهمني الا فيك شوية حنية
راه الوطن كيموت فصمت البشرية
خصنا نفيقو قبل ما تولي نهاية
ويرجع الزمان بلا روح بلا هوية
بقلم الزجال حسن السريفي
