****************
المولوع سرج عودو جا الوقت الموسم احضر
حط السرج اعميري كبريتي بالصم ملقم
و منساش يعلق الدليل صويك بالمصحف عامر
الجابادور و السلهام بزيوي فيه الترسان مبرشم
و خنجر الكوميا مرصع بالنقرة و الجوهر
السروال القندريسي مفضفض من لتحت محزم
و البلغة جلد فاسية رطبة لونها اصفر
و العمامة مشرقية دايرة محزومة مسقم
و اللجام مجدولو احرير و الكبالة تحتو تظهر
و المكحلة مزينة بالنقرة من الزناد حتى للفم
و العلام اجمع الصربة دخل للمحرك مشور
و الصربة تحت الربعين و العلام عليها متقدم
راكب على كمري ابيض زياني يروبع و يتحير
و احداه أصناف الخيل بإسم الله كلشي سالم
ها البركي لونو محروق قاتم شوفتو تبهر
و الأزرق احداه مشقوق جامع فمو و ملجم
و الادهم في جنبو مغلوق لونو يلمع كي الفاخر
و الكمري اللي حاط الريال ها الابيض ها الاشخم
و البركي السليماني مركز كامل لونو احمر
و الصنابي عود مهيب لونو اصفر فوقو معمم
ها الصربة جات نوبتها الخيل تجدب كلشي حاضر
و الباردية يجريو مقادين كلا في عودو حاكم
و العلام الوسط كيغوت الحفيظ الله بها يجهر
و الخيل حدات المحرك و العمارة في دقة تتكلم
و المكاحل صاحت بوم شاعلة كي طفطاف الجمر
و القرصة مليحة ماصة و الجمهور يصفق مزاحم
و با التهامي هاز القلة بماها يخبطها و تتكسر
تبوريدة بلادي ليها تاريخ كانت للغزاة كتقاوم
و كاع الخيل معاها الخير و ربي ليها ميسر
بقلم : رضوان ضمان
المغرب
