--------------------------
القرآن نزّلها بآية مفصلي
كُبُر الأمانة و بالامانة مُنزّلي
رفضِت جبال الكون تِحمل تِقِلها
متأكدة بتعرف شو هيي حاملي
تِقل الأمانة للبِيحمل حِمِلها
بالوفا و الإخلاص جوهر شاملي
صِدق و شهامة و استقامة شكلها
ما بين خير و شر فاصل عاملي
الكتب السماويه بمنابع أصلها
بتعرف نتائجها و ما كانت جاهلي
الإنسان نفسو للأمانة و عدلها
جاهل و ورطتها بعواقب فاعلي
رد الأمانة بالأمانة بمهلها
النفس حتّى تكون حـرّة و عادلي
بالعقل و الإنصاف تِشغِل عقلها
و تعطي لأصحاب الأمانة حقوقها
متل ما هيي الأمانة كاملي
بالأمَّنك إياك تغدر أو تخون
مهما عليك الحِمِـل زايد أو ديون
رِد الأمانة بكل إخلاص و وفا
للشخص يللي أمَّنك مهما يكون
للأمَّنك لا لا ما تعمل لو جفا
ابقى متل ما إنت بو القلب الحنون
سراج الوَفي للناس عمرو ما انطفى
بيظل والع و الشرف إسمو يصون
و لو ساقبت شيطان عاصدرك لفى
تخون . أوعى على تفكيرك يمون
الشاعر د. علي مسلم عجمي
لبنان
