كسرت قلبى
بقلم شريف شحاته مصر
القلب اللى إنت كسرته يا حبيبى ولسة شاريك
والبال مشغول بحيرته سهران بيفكر فيك
القلب اللى إنت كسرته
شايفك فرحان بعذابى ومرار حالى بيضنينى
والشوق واقف على بابى حيران من دمعة عينى
ونجوم ليلى تفكرنى بغرامى وسهدى معاك
وساعات قلبى يصبرنى وبيشغل عقلى هواك
وأرجع من تانى أشتاقلك وأفكر لما أقابلك
ولسانى يغنى بسيرته القلب اللى إنت كسرته
القلب اللى إنت كسرته
حاولت كتير أنساك وأعيش الشوق من تانى
ما قدرتش أنسى هواك ياسبب همى وحرمانى
وأنا إيه اللى غصبنى أطاوعك يا ظالمنى بقسوة قلبك
مغرور والقسوة فى طبعك ياما شفت هوان وأنا جنبك
وأعيش على الذكرى لوحدى وأتحمل نارى وسهدى
وكفاية اللى إتحملته القلب اللى إنت كسرته
القلب اللى إنت كسرته
الليل بقى خلى وصاحبى من قسوة ظلمك فيا
سهران بيصبر قلبى ويخفف نارى عليا
بيقولى كفاية عليك الحيرة ونار تعذيبه
طول عمره بيظلم فيك وما كنت فى مرة حبيبه
ولا يوم فكر فى رجوعك ولا حس فى يوم بدموعك
إياك تندم بخسارته القلب اللى إنت كسرته
القلب اللى إنت كسرته
