بقلمي جمال القاضي
( بدون فصحى )
زعلان من نفسك ليه؟ ايه فيها مش عاجبك ؟الأسلوب ولا الشكل ولاكلها على بعضها ؟ ولا كان نفسك تبقى حد تاني غيرك ومعرفتش؟
على فكره انت انسان كويس ومش واخد بالك من كده، انت ممكن تكون حلم من احلام غيرك، على فكره كمان شكلك مش انت ال خلقته، ربنا خلقك باحلى صورة وهيا المناسبه ليك، طيب بص على ال حواليك كده، شوفت ال في وشه ايه ده دي وحمه ماليه وشه، شوفت كمان ال وشه محروق هناك ده، شوفت ال مش عارف يتكلم بسبب اعوجاج في فكه او عيب خلقي في احباله الصوتية او حاجه مش عارفين ايه هيا في الحنجرة، شوفت ال مش قادر يمشي وعلى الأرض وعليها بيزحف، شوفت ال قاعد هناك ده على الرصيف وكل يوم شايفه وأنت معدي رايح لشغلك مبهدل في نفسه علشان مش لاقي حد يغير له او يغسل الملابس ال عليه، شوفت ال ماشي على عكاز واتنين ساندينه، شوفت ال في بيته بيحسس على الحيطه علشان مش شايف المكان ال رايح يقضي فيه حاجته
طيب ايه، انت كنت عايز تبقى زي مين في نظرك، هو مين ال شوفته وكان في منتهى الجمال وفضل جماله زي ماهو، فين التراب ومين تحته، فين الجمال وال فضل على حاله منه؟ فين وفين فنانات الحسن والجمال والدلال ال كنتي وانت أدام مرايتك وتسريحة لشعرك كنت تعمليها علشان تطلع زيها بالظبط ؟ فين حقن البوتكس ؟شفتيها ولا تسمعي عنها؟ طيب فين الوجه وال صار عليها وكأنه استخدم فيه جهاز يملأ تجاعيده هواء ولما يروح الهواء تشوفه انسان تاني بس في صورة قرد، مش دي ال كنتي عايزه تبقي زيها ولا ايه ؟ طيب يابرنس يالي كنت عايز تشبه الممثل بقصة شعره وصياعته عجبك شكله لما عملت زيه ولا ايه ؟ بس انت بقيت ايه لما عملت زيه في نظر ال حواليك ولسه بيحبوك ولا محدش طايق يشوفك منهم ؟
طيب مش عاجبك اسلوبك ليه ؟ هو اسلوبك ده مش من شخصيتك ؟ طيب عاجبك اسلوب مين ؟ اه فلان ابن فلان عارفه كويس، طيب ايه معطلك علشان تبقى زيه ؟ ماتيجي تغير منه وتخليك ذوق، ذوق في تعاملك مع غيرك، ذوق مع الست ال بتركب الاتوبيس ولا الميكروباص وتلاقيك زي الهلف كده ومعندكش دم وانت قاعد وهيا واقفه ادامك وبتتألم من كتر وجع حملها او ضعف جسمها، او كبر سنها، عملت ايه معاها قولي ؟ هو ده الأسلوب ال مش عاجبك وعايز تغيره ؟ طيب مستني ايه متغيره بس للاحسن؟
مشكلتنا عدم القناعه وعدم الرضا على عطيا ربنا لنا وعايزين نشبه غيرنا وخلاص مع ان غيرنا عايز هو كمان يبقى زينا،انت ممكن بشكلك ال مش عاجبك تكون حلم من أحلام حد تاني بس مش واخد بالك، ممكن تكون جميل في نظر غيرك بس لأنك عايز تكون فلان بعينه مش راضي على نفسك، اما الأسلوب سهل تغيره، سهل تكون احسن وتتغير فعلا، بس عايز تقول نفسك الحمد لله الذي عافانا مما اصاب به الكثير من غيرنا، وكل هيئة انت عليها صدقني هي دي الهيئة المناسبه لك ومش غيرها بس حاول تجمل منها شويه ومش عيب لان الله جميل يحب الجمال، بس ارضى عن نفسك وتبطل تقارن مابينك وبين غيرك، صدقني هترتاح وتعيش مبسوط في حياتك والله حتى لو كانت العطايا او المنح ال ربنا اعطاها لك شويه هتشوفها كتير بس حاول تجرب .
