*********
شايلة القفة وفيها شوية وجع
والضهر محنى ياولداه
عينها على الدار والشابة والجدع
وظل الحيطة كما خلقه مولاه
سابت وراها الجمال والمال والدلع
وفضل معاها التعب وقولت آه
كانت شابة والكل يطلب رضاها
ومايعجبها غير شاب عايق
قالت عاجبنى وقال دى اللى اتمناها
عاوج طاقيته وفى الدلال سايق
وحبت دلاله وكان جاي على هواها
وعاش معاها على مزاجه ورايق
بنت الاصول شالت الحمل وياه
وراضية بالقسمة والمكتوب
واول فرحتها على الكتف شيلاه
وتسعد بنظرة من المحبوب
وتحب كل اللى يحبه مدام يهواه
وكان قدر والهوى معيوب
وابو الطاقية نايم من غير سبب
اشيل بايدى وياريتها ماقالت
وجمالها راح والضهر طلعله اتب
لما هموم الدنيا عليها مالت
لمين تشكى ومين عليه العتب
والوكسة هلت وعليها طالت
من حبها سكتت وبلعت الزلط
لكن لكل شىء احتمال
ماهو اختيارها من أوله غلط
المال عمره مايشترى الرجال
وقليل الحيلة جه عندها وربط
وقالها شيلى ياأم العيال
والقفة كبرت وحملها زاد واتملى
والضحكة اختفت مع الاحزان
حتى خلفتها من صلبه كان مبتلى
قالوا ياسعدها بخلفة الصبيان
لكن مين نجح ومين فوق اعتلى
ومين سارح فى غربته هيمان
والدنيا واخدة حياتها فى وشها
تطوحها شوية شمال ويمين
تاهت فى الدنيا تعافر وحدها
وقسي قلبها وجف دمع العين
ملهاش فى الدنيا سند غير ربها
كنت حترمى حمولك على مين
بقلمى ايمان جمعة رمضان
جمهوريه مصر العربيه
